ایس ایس سی امتحانات کی تواریخ میں تبدیلی!

حیدرآباد۔17؍دسمبر(اعتمادنیوز) دسویں جماعت کے سرکاری امتحانات کی تواریخ میں تبدیلی کا امکان ہے ۔ قبل ازیں جاری کردہ اعلامیہ کے مطابق 26 ؍ مارچ سے ایس ایس سی امتحانات کا آغازہونے والا ہے جو 9؍ اپریل تک جاری رہیں گے ۔ انٹر میڈیٹ کے کمیسٹری امتحان کے دن 26 ؍ مارچ سے دسویں جماعت کے امتحانات کے آغاز پر انٹر میڈیٹ بورڈ نے مشکلات کا خدشہ ظاہر کیا ہے کیوں کہ اس دن تقریباً 8 لاکھ طلبہ کمیسٹری امتحان تحریر کریں گے ۔ دسویں جماعت کے امتحانی مراکز بنائے گئے 200 اسکولس میں انٹر میڈیٹ بورڈ کی جانب سے امتحانات منعقد کئے جارہے ہیں ۔ انٹر میڈیٹ ‘



دسویں جماعت کے امتحانات کے آغاز میں صرف آدھے گھنٹہ کا فرق ہے ۔ بورڈ آف انٹر میڈیٹ کے ذمہ داروں کا ماننا ہے کہ ایک دن میں دو امتحانات منعقد کروانا ممکن نہیں ہے ۔ اس مسئلہ پر بورڈ نے محکمہ تعلیمات کو مکتوب روانہ کیا ہے ۔ اس طرح دسویں جماعت کے سرکاری امتحانات جن کا 26 ؍ مارچ سے آغاز ہونے والا ہے ‘ میں ایک یا دو دن کی تاخیر کا امکان ہے ۔ اس سلسلہ میں عہدہ داروں کی جانب سے عنقریب اعلامیہ جاری کیا جائے گا ۔ ذرائع کے مطابق انٹر میڈیٹ بورڈ کے عہدہ داروں نے سرکاری تعطیلات کے اعلان سے قبل ہی امتحانات کی تواریخ طئے کردی اسی لئے یہ صورت حال پیدا ہوئی ۔